ફાઈવ સ્ટાર ચીકી
સામગ્રી :
100 ગ્રામ ખસખસ,
100 ગ્રામ તલ,
100 ગ્રામ છીણેલું અથવા તૈયાર સૂકું કોપરું 100 ગ્રામ કાજુના નાના ટુકડા
100 ગ્રામ પીસ્તાના નાના ટુકડા
300 ગ્રામ ચીકીનો ગોળ
2 ચમચી તેલ.
રીત:
સૌપ્રથમ ખસખસ, તલ, કોપરું, કાજુ અને પીસ્તાને જુદાંજુદાં થોડાં શેકી લેવાં. તેલ, લગાવીને થાળી તૈયાર રાખવી. ગોળને ધીમે તાપે ગેસ પર રાખી પાયો કરવો. સતત હલાવતાં રહેવું ને ગોળ વાસણથી છૂટો પડવા માંડે (ચોંટે નહીં) ત્યારે ચમચીમાં લઈ ઊંચેથી ધાર પાડી જોવી. તાર નીકળતા દેખાય (અજવાળા તરફ ચમચી ધરતાં, હવામાં તાર નીકળતાં દેખાશે) કે તરત જ બધી વસ્તુઓ અંદર નાંખી ઝડપથી બધું મિક્સ કરવું ને થાળીમાં ઠારવું. ઊંધી થાળી હોય તો વેલણથી વણવું અથવા સીધી થાળીમાં, ચપટી વાટકી પાણીવાળી કરી ઠોકવાથી ચીકી એકસરખી પથરાઈને ચોંટી જશે. ચીકી સહેજ ગરમ હોય ત્યારે જ પાણીવાળી છરીથી આરપાર કાપા પાડી દેવા. બરાબર ઠંડી થાય પછી ઉખેડી ડબ્બામાં ભરવી. (બે ચમચી ગુંદરનો ભૂકો ભેળવવાથી વધુ ગુણકારી બનશે.)